Մամուլի հաղորդագրություն, 10.12.2012թ.

 

Լրանում է նշանավոր ռադիոֆիզիկոս Էմիլ Միրզաբեկյանի 90-ամյակը

 

 

Դեկտեմբերի 12-ին լրանում է հայ նշանավոր ռադիոֆիզիկոս ակադ. Էմիլ Հայկի Միրզաբեկյանի 90-ամյակը: Ծնվել է 1922թ. Երևանում: Մասնակցել է Հայրենական մեծ պատերազմին: 1950-ին ավարտել է Երևանի համալսարանը: 1951-ից աշխատել է ՀԽՍՀ ԳԱ Ֆիզիկայի ինստիտուտում, ընդունվել է Մոսկվայի Պ.Ն. Լեբեդևի անվ. ֆիզիկայի ինստիտուտի ասպիրանտուրան և նշանավոր ռադիոաստղագետ Ս.Է. Խայկինի ղեկավարությամբ պաշտպանել է թեկնածուական թեզ: 1955-60-ին աշխատել է Բյուրականի աստղադիտարանում: 1960-ից եղել է աստղադիտարանի ռադիոաստղագիտության բաժնի հիման վրա իր իսկ կազմակերպած ՀԽՍՀ ԳԱ նորաստեղծ Ռադիոֆիզիկայի և էլեկտրոնիկայի ինստիտուտի տնօրենը: 1971-ին ընտրվել է ՀԽՍՀ ԳԱ թղթակից-անդամ, 1974-ին` ակադեմիկոս, 1974-76-ին եղել է ՀԽՍՀ ԳԱ ֆիզիկատեխնիկական գիտությունների և մեխանիկայի բաժանմունքի ակադեմիկոս-քարտուղար, իսկ 1976-ից` ՀԽՍՀ ԳԱ փոխպրեզիդենտ: Դասավանդել է ԵՊՀ-ում, որտեղ իր նախաձեռնությամբ բացվեց ռադիոֆիզիկայի ֆակուլտետը:

Գիտական աշխատանքները նվիրված են գերբարձր հաճախականությունների (ԳԲՀ) տիրույթի գերզգայուն ռադիոընդունիչ համակարգերի ուսումնասիրությանը: Նա Հայաստանում ԳԲՀ ռադիոֆիզիկայի հիմնադիրն է: Ստեղծել է էլեկտրամագնիսական ճառագայթման հետազոտման սարքերի նոր դաս, առաջինն է ուսումնասիրել Արեգակի ռադիոճառագայթման բևեռացումը: Նրա ուսումնասիրությունները գործնական լայն կիրառություն են գտել տնտեսության տարբեր բնագավառներում: Իր աշխատակիցների հետ ստեղծած գերզգայուն ընդունիչ համակարգերը կիրառվում են տիեզերական հետազոտություններում:

Միրզաբեկյանը 1961-ին ընտրվել է Միջազգային աստղագիտական միության անդամ: Նա ՀԽՍՀ գիտության և տեխնիկայի վաստակավոր գործիչ էր (1974), ՀԽՍՀ X գումարման Գերագույն խորհրդի պատգամավոր: Պարգևատրվել է Կարմիր աստղի, Հայրենական պատերազմի 2-րդ աստիճանի և Հոկտեմբերյան հեղափոխության շքանշաններով: Ծանր հիվանդությունից հետո վախճանվել է 58 տարեկանում, 1980թ. սեպտեմբերի 16-ին Մոսկվայում:

 

Հայկական աստղագիտական ընկերություն