Մամուլի հաղորդագրություն, 11.12.2012թ.

 

2013թ. աստղագիտական իրադարձությունների տեղեկատու էջը

 

Description: http://www.aras.am/FamousAstronomers/photos/image003.jpg

 

Հայկական աստղագիտական ընկերության (ՀԱԸ) համացանցային կայք-էջի Իրադարձությունների օրացույց բաժնում (Calendar of Events) այժմ արդեն հասանելի է 2013 թվականի օրացույցը, որտեղ ներկայացված են այս պահին հայտնի 2013թ. բոլոր կարևոր աստղագիտական իրադարձությունները, այդ թվում ինչպես երկնային երևույթները, այնպես էլ միջազգային և հայկական աստղագիտության մեջ նախատեսվող միջոցառումները: Առաջին խմբում ընդգրկված են Արեգակի և Լուսնի խավարումները (2013թ. համապատասխանաբար` 2 և 3), բոլոր հիմնական (թվով 20) ասուպային հոսքերը, Լուսնի փուլերը, մոլորակների դիմակայությունները, միացումները և ծածկումները Լուսնի կողմից, ամենավտանգավոր երկրամերձ աստղակերպերի և երկնաքարերի անցումները: Նոյեմբեր-դեկտեմբեր ամիսներին սպասվում է գերպայծառ գիսավոր Իսոնի մոտեցումն Արեգակին: Երկրորդ խմբի իրադարձությունների մեջ են Բյուրականի աստղադիտարանի և ՀԱԸ կարևորագույն գործերը, միջազգային և տեղական գիտաժողովները, խորհրդակցությունները, ամառային դպրոցներն ու աստղագիտական օլիմպիադաները, հայ և օտարազգի նշանավոր աստղագետների տարեդարձները: Մասնավորապես, հուլիսին Ֆինլանդիայի Տուրկու քաղաքում տեղի կունենա Եվրոպական աստղագիտական ընկերության համագումարը: Իսկ հայկական աստղագիտության գլխավոր իրադարձությունը կլինի Միջազգային աստղագիտական միության հոկտեմբերի 7-11 կայանալիք թիվ 304 գիտաժողովը` նվիրված Բենիամին Մարգարյանի 100-ամյակին: 2013-ին նշվելու են նաև հայ աստղաֆիզիկոսներ Թադևոս Աղեկյանի և Գուրգեն Սահակյանի 100-ամյա հոբելյանները:

Կայք-էջի հասցեն է http://www.aras.am/Calendar/calendar.htm:

 

Հայկական աստղագիտական ընկերություն