Մամուլի հաղորդագրություն, 01.07.2013թ.

Ավետիք Գրիգորյանի «Դարերի խորքից դեպի Տիեզերք» գրքի շնորհանդեսը

Հուլիսի 4-ին (հինգշաբթի) ժամը 12:00-ին ՀՀ Գիտությունների ազգային ակադեմիայի (ԳԱԱ) նախագահության կլոր դահլիճում (Բաղրամյան 24, 2-րդ հարկ) տեղի կունենա աստղագետ, ՀՀ ԿԳՆ Տեխնիկական ստեղծագործության հանրապետական կենտրոնի տիեզերագիտական խմբակի ղեկավար Ավետիք Գրիգորյանի «Դարերի խորքից դեպի Տիեզերք» գիտահանրամատչելի գրքի շնորհանդեսը: Գիրքը կներկայացվի հեղինակի կողմից, որից հետո ելույթներով հանդես կգան ՀՀ ԳԱԱ թղթակից անդամներ Էլմա Պարսամյանը և Արթուր Իշխանյանը, Հայկական աստղագիտական ընկերության համանախագահ Արեգ Միքայելյանը, Բյուրականի աստղադիտարանի տնօրեն Հայկ Հարությունյանը, պրոֆեսոր Հայկ Սարգսյանը, ՀՀ ԿԳՆ Տեխնիկական ստեղծագործության հանրապետական կենտրոնի տնօրեն Ֆերդինանդ Ղարիբյանը:

Գիրքն իրենից ներկայացնում է հետաքրքրաշարժ, գիտահանրամատչելի պատմություն ճանաչման այն ուղու մասին, որ անցել է մարդկությունը օդագնացության, ավիացիայի, աստղագիտության և տիեզերագնացության բնագավառներում՝ սկսած քարե դարից մինչև մեր օրերը, ինչպես նաև գալիք տիեզերական ապագայի մասին: Հրապուրելով արտերկրային, արտասովոր երևույթներով ու առեղծվածներով՝ գիրքը քայլ առ քայլ տանում է ընթերցողին  պարզ, սովորական գաղափարներից դեպի խոր, բազմակողմանի բնագիտական ու տեխնիկական գիտելիքներ, արթնացնում նրա մեջ պրպտող հետաքրքրասիրություն, զարգացնում ստեղծագործելու ձգտում և ունակություն, ինչպես նաև տալիս է համապարփակ աշխարհայացք Տիեզերքի և նրա ուսումնասիրության մասին:

Գիրքը տպագրվել է ՀՀ Նախագահի կողմից հատկացված Երիտասարդ գիտնականների աջակցության ծրագրի (ԵԳԱԾ) միջոցներից և տրամադրվելու է Հայաստանի բոլոր դպրոցներին:

Գրքի կայք-էջի հասցեն է http://ayas.ar.am/

Հայկական աստղագիտական ընկերություն