Մամուլի հաղորդագրություն, 13.07.2013թ.

 

Ֆինլանդիայում ավարտվեց Եվրոպական աստղագիտական համագումարը

 

 

Ֆինլանդիայի Տուրկու քաղաքում իր աշխատանքներն ավարտեց Եվրոպական աստղագիտական համագումարը, որը պաշտոնապես կոչվում է Աստղագիտության և տիեզերագիտության եվրոպական շաբաթ (European Week of Astronomy and Space Science EWASS) և անցկացվեց հուլիսի 8-13-ին: Այն եվրոպական աստղագետների տարվա գլխավոր իրադարձությունն է, որն անցկացվում է ամեն տարի եվրոպական երկրներից որևէ մեկում: Համագումարին ներկա էր 51 երկրի շուրջ 650 աստղագետ, ներառյալ ճանաչված գիտնականներ, եվրոպական աստղագիտական կառույցների ղեկավարներ և մեծ թվով երիտասարդ աստղագետներ: Հայաստանից համագումարին մասնակցում էր Հայկական աստղագիտական ընկերության համանախագահ Արեգ Միքայելյանը: Եվրոպական համագումարի շրջանակներում անցկացվեց 12 գիտաժողով, 14 հատուկ նստաշրջան և 9 հատուկ խորհրդակցություն, ինչպես նաև մի շարք այլ միջոցառումներ` 7 պլենար զեկուցում, Եվրոպական աստղագիտական ընկերության (ԵԱԸ) Գլխավոր ասամբլենան (տարեկան հաշվետվությունը և ղեկավար մարմինների ընտրությունները), Եվրոպական հետազոտական խորհրդի (European Research Council ERC) նստաշրջանը, Եվրոպական աստղագիտության ASTRONET տասնամյակային ռազմավարական ծրագրի խորհրդակցությունը, այլ վարչական նիստեր, եվրոպական աստղագիտական մրցանակների հանձնումը և այլն: Միքայելյանը տարբեր գիտական նստաշրջաններում հանդես եկավ երկու զեկուցումներով, մասնակցեց ԵԱԸ խորհրդի ընդլայնված նիստին, եվրոպական տիեզերական խոշորագույն ծրագրի` ԳԱՅԱ-ի քննարկմանը, ASTRONET խորհրդակցությունը և բազմաթիվ քննարկումներ ունեցավ եվրոպական աստղագիտական կառույցների ներկայացուցիչների հետ:

Արդեն հայտնի է, որ եվրոպական աստղագիտական հաջորդ համագումարը տեղի կունենա Շվեյցարիայի Ժնև քաղաքում, 2014թ. հունիսի 30-ից հուլիսի 4-ին:

 

Հայկական աստղագիտական ընկերություն