Մամուլի հաղորդագրություն, 18.07.2013թ.

 

Հայաստանը մասնակցեց Մոլորակային տվյալների միջազգային ալյանսի գործադիր խորհրդի նիստին

 

 

2013թ. հուլիսի 16-18-ին Փարիզում` Ֆրանսիայի Տիեզերական հետազոտությունների ազգային կենտրոնում (CNES Centre National dEtudes Spatiales) տեղի ունեցավ Մոլորակային տվյալների միջազգային ալյանսի (IPDA International Planetary Data Alliance) գործադիր կոմիտեի VIII նիստը: Ներկա էին IPDA անդամ երկրների և տիեզերական գործակալությունների ներկայացուցիչները, ինչպես նաև առաջին անգամ հրավիրված էր Հայաստանի ներկայացուցիչը: IPDA անդամ են հանդիսանում Ամերիկյան օդագնացության և տիեզերական գործակալությունը` ՆԱՍԱ-ն (NASA National Aeronautics and Space Administration), Եվրոպական տիեզերական գործակալությունը (ESA European Space Agency), CNES-ը (Ֆրանսիա), Իտալական (ASI Agenzia Spaziale Italiana, Իտալիա), Գերմանական (DLR), Մեծ Բրիտանիայի (UK Space Agency), Ճապոնիայի (JAXA Japan Aerospace Exploration Agency), Չինաստանի (China National Space Administration), Հնդկաստանի (Indian Space Research Organization) տիեզերական գործակալությունները և Ռուսաստանի Տիեզերական հետազոտությունների ինստիտուտը ( ): IPDA-ն զբաղվում է մոլորակային տվյալների ստացմամբ և արդյունավետ օգտագործման հնարավորություններ ստեղծելով, սերտորեն համագործակցում է Տիեզերքի հետազոտման կոմիտեի (COSPAR) և Վիրտուալ աստղադիտարանների միջազգային ալյանսի (IVOA) հետ:

Հայաստանից նիստին մասնակցում էր Հայկական աստղագիտական ընկերության (ՀԱԸ) համանախագահ, Հայկական վիրտուալ աստղադիտարանի (ՀՎԱ) ղեկավար Արեգ Միքայելյանը: Նա ելույթ ունեցավ` ներկայացնելով հայ աստղագետների գործունեությունը տիեզերական հետազոտությունների բնագավառում և մոլորակային տվյալների օգտագործման մեջ հայկական աստղագիտական տվյալների շտեմարանների ներդրումը: Հաշվի առնելով, որ Բյուրականի աստղադիտարանում իրականացված Մարգարյանի շրջահայության թվայնացման նախագիծը բազմաթիվ հնարավորություններ է ընձեռում փոքր մոլորակների ուսումնասիրության համար, որ ՀՎԱ-ն հանդիսանում է IVOA ակտիվ անդամներից մեկը և վերջերս Հայաստանում նաև ստեղծվել է Հայկական տիեզերական գործակալություն, Հայաստանն ընդունվեց IPDA: Տեղի ունեցան նաև բազմաթիվ քննարկումներ այլ տիեզերական գործակալությունների ներկայացուցիչների հետ:

 

Հայկական աստղագիտական ընկերություն